Taringot tu Namardongan

19 Agu

Donganku naburju, sapinggan saparmodoman
Golom ma tanganku
Paroa-roa ma dohot tondimu
Aha do luai na tarbege di laung ni ari on?

Dung dao mada hita mardalanan
Sian dolok tu toruan
Ami sian Batang Gadis, Amu sian Simarsayang
Maronang-onang di Tapian Nauli

Dung leleng mada hita marsiarsakan
Margonti marsiapus ilu, marsitoguan
Sampe matombuk sapu tangan hangoluan
Maripuk tungkot sitiopon
Umbaen las ni ari dot tangkok ni pardalanan ta on

Pala bonom sogot mata ni ari
Alilu pe da ngada be tarida. Aropku,
Juguk-juguk ma ita painte borngin ni ari
Mangalehen kaji sipaingot tu anak paompu

‘se nga binoto ise parjolo jumolo
Ulang lompit amak sumbayang i
Ulang tutup kitob kaji i
Sai ingot majolo dongan maposo…

Jurang Mangu Timur,
22 Desember 2007
Ikhwan Muslim Nasution

2 Tanggapan to “Taringot tu Namardongan”

  1. Fadhly Abadan Syakuro Nasution Maret 3, 2009 pada 10:48 am #

    Ass. WW,

    Nasantak mantong baya puisi muyu on ayah,
    Poso caritona, tai inda baen diposo-poso sajo
    Tobang muse parobanna, tai inda hum di natobang2 muse.
    Tambai torus ayah, malapat-lapat doma ulala roai mambasana, jarang doma dapot na sonon sannari apalagi dihalak kita di pangarantoan.

    Wassalam

    Balas
  2. risalahperjalanan Maret 5, 2009 pada 7:22 am #

    Wslm…
    Tarsongon judul nai dei, Uda.
    “Taringot namardongan”.

    Latar belakangna, atia SMA di SMA Matauli Sibolga dohot dongan2 na sian lain-lain huta dohot daerah.

    Madung ubaca ma saotik profile ni Uda i.
    Au pe alak Mandailing Julu do au: Kotanopan.

    Sonang mada roha i mangaligi gambar2 ni huta i, apalagi gambar ni Kotanopan na di blog ni Uda i.

    Balas

Tinggalkan komentar