si jalandit & si jalotok

Sapala, ke mada si jalandit dohot si jalotok tu topi aek godang an. Nagot mambuat sanggar-sanggar dot galoga mada on. Dapot mantong. Sakobek sanggar-sanggar, sakobek muse galoga na. Mulak ma ‘lai ‘ntong. Ke muse ma ‘lai manjalaki lidi dohot bulu. Si jalandit tu kobun arambiran, si jalotok tu topi sabaan. Dapot. Adope, i muloan mada namambaen cangkak pamikek on. Si jalandit mambaen cangkak ngun sanggar-sanggar. Isusuk i ia ma sanggar-sanggar i dot lidi. Si jalotok mambaen cangkak ngun galoga. Padomu-domu galoga on angkon dot bulu do so bisa. Anggo lidi, inda lobas na i, mangkaripuk mei. Hasidungan na, ma salose cangkak i. Cangkak ni si jalandit i baen pamikek ni siur-siur, lobe-lobe, sanga rata-rata. Cangkak ni si jalotok i pamikek ni leto, balom, sanga ruak-ruak. Pendek carito, marangkat ma ‘lai incogot nai mamikek.

* tarsai majolo, so ada alangan itamba muse.

 

 

Sribilah Siang Eksekutif 7D, 24 Agustus 2011
Ikhwan Muslim Nasution

Pangalusi ni: “Onang-Onang ni Sada Bayo i Topi Aek Batang Gadis”

kehe uida si bayo godang

ima tu topi ni aek godang

disi ia maronang-onang

laos painte potang-potang

atia maradian di aek godang

laos manaonkon pandoit ni agas

taringot ia poda ni natobang

anggo sikola angkon naringgas

Oleh: Abdul Majid Nasution

Onang-Onang ni Sada Bayo i Topi Aek Batang Gadis

Jongjong ma~u antong,
Sasada au potang-potang
I topi ni Aek Batang Gadis
Manaonkon gatal pandoit ni agas

Aek pe na lotok do be
Pajat, mur mamenek, ari tu ari
Giot manggore, aek ama na lotok be
Giot manjala le, gulaen pe payah sannari

Partunda isega-sega alai mei arangan godang an
Tu iba ma dangol na
Murmapajat aek le, mur ma pajat pancarian
Manggore inda ra, manjala pe inda bisa

Oh, Tuhan na kasih!!!
Sosalan doma da na sosalan
Tampang ni sugari naso dapotan
Lehen ma di au kasobaran
Mandalani las ni ari di parsuadaan on

U sodari do, Tuhan
Au na losok marsiajar
Inda na tarajar
Au na losok marsikola
Inda na śe ké sikola

Losok naso tarubatan
Sosal naso tarsosalan

On pe, itopi ni Aek Batang Gadis on
Utaonkon ma gatal pandoit ni agas
Pamata-mata i lotok ni aek on
Painte lumpat ni Mera sanga Ikan Mas

Kisaran, 8 Ramadhan 1430 H / 29 Agustus 2009

Ikhwan Muslim Nasution

si Bayo Tobang (na Malosok Sikola)

Margulung-gulung ma le baya si bayo tobang
i sopo ijuk, i tonga saba jae an
gale-gale ma lepe-lepe
songon pargolap ni ari na rimbus on: pabile-bileon

Ro ma i ida ia sada-sada i roa i
rupo muko na santak jaji
pangolu gara ni lungun tu jae tu julu
tu si anu, si anu, si anu…

Abis ma da Sitogol, tomat muse ma Sibulus-Bulus Sirumbuk-Rumbuk i da
onang-onang doma na onang-onang da
dulang panggore ni sere hangoluan na matombuk naso tarpature
tajak saba na majal paninggalan ni Namora Natoras naso tartajakkon be

Ngada be da be Amang i
Na tarjadi madung solpu ma i tarjadi
Inda si sosalan be parange na malosok tu sikola
Inda si solan be parange na malosok marsikola

Medan Deli, 23 Maret 2009
Ikhwan Muslim Nasution

Taringot tu Namardongan

Donganku naburju, sapinggan saparmodoman
Golom ma tanganku
Paroa-roa ma dohot tondimu
Aha do luai na tarbege di laung ni ari on?

Dung dao mada hita mardalanan
Sian dolok tu toruan
Ami sian Batang Gadis, Amu sian Simarsayang
Maronang-onang di Tapian Nauli

Dung leleng mada hita marsiarsakan
Margonti marsiapus ilu, marsitoguan
Sampe matombuk sapu tangan hangoluan
Maripuk tungkot sitiopon
Umbaen las ni ari dot tangkok ni pardalanan ta on

Pala bonom sogot mata ni ari
Alilu pe da ngada be tarida. Aropku,
Juguk-juguk ma ita painte borngin ni ari
Mangalehen kaji sipaingot tu anak paompu

‘se nga binoto ise parjolo jumolo
Ulang lompit amak sumbayang i
Ulang tutup kitob kaji i
Sai ingot majolo dongan maposo…

Jurang Mangu Timur,
22 Desember 2007
Ikhwan Muslim Nasution